Verða innflytjendur sem hér setjast að Íslendingar, eða bara ódýrt vinnuafl?

Ég horfði á þáttinn sem var sendur út frá Selfossi á þriðjudag. Frjálslyndir virðast vera að missa flugið í "innflytjendamálinu" og er það miður. Hinir flokkarnir eru alveg samtaka í að kæfa þessa umræðu þar sem þeir horfðu upp á mikið fylgi fara frá sér yfir til Frjálslyndra. Þrátt fyrir að leggja ekkert til málana annað en tala um rasisma og setja upp vandlætingarsvip. Það var ágætis leikrit hjá Árna Þór, þegar hann sat með yfirlætissvip og sagðist ekki eiga að þurfa að sitja undir þessu. En þetta leikrit virðist ætla að duga til að kæfa umræðuna.

Þegar leikritið fer af stað missa Frjálslyndir flugið og þvælast í málinu eins og köttur í kringum heitan graut, en komast ekki að kjarnanum. Umræðan fór mjög vel af stað í vetur. En það var kannski klaufaskapur að fara að taka múslima sérstaklega fyrir, þó við séum flest að hugsa það sama hvað þá varðar, líka þeir sem telja sig vera umburðarlyndastir.

Kjarni málsins er að það eru ekki innflytjendur sem eru vandamálið, heldur við sem erum hér fyrir. Langflestir koma í leit að atvinnu. Margir af þeim setjast hér að vegna atvinnunnar og geta átt hér betra líf, en í heimalandinu. Aðrir setjast að þegar þeir átta sig á því að hér geta þeir haft það ágætt á sósíalnum. Að síðustu koma hingað glæpamenn, afbrotum innflytjenda fjölgar og þeim fjölgar á Hrauninu. Þetta á að ræða. Umræðan fer alltaf út í það að láta eins og hingað komi eingöngu harðduglegt fólk, sem hafi þá einu hugsjón að bjarga íslensku efnahagslífi. Þegar umræðan fer á þetta hallærislega plan sitja Magnús Þór og Guðjón eins og prúðir fermingardrengir, í stað þess að koma sér að kjarna málsins. Það var alveg í takt við þessa lágkúru að utanríkisráðherra kom með það sem innslag á fundinum á Selfossi að hún væri gift útlendingi og ætti með honum yndisleg börn. Sem hefur ekkert með þessa umræðu að gera og lýsir engu öðru en yfirlæti og hroka ráðherrans. Enginn fundarmanna gerði athugasemd. Ég óttast að ef ekkert verður að gert fjölgi auðnuleysingjum og glæpamönnum í hópi innflytjenda. Ég geri mér grein fyrir að það getur orðið erfitt að koma í veg fyrir að þeir slæðist með, en það er óþarfi að dekra við þá, eða laða að.

Ég hefði alveg eins geta verið að tala um þá hópa Íslendinga sem hafa flust til annarra landa. Þeir eru svo sannanlega ekki allir til sóma. Þó svo að þeir séu það langflestir og séu nýtir þjóðfélagsþegnar hvar sem þeir eru.

Vandamálið er að margir atvinnurekendur hafa komist upp með að nýta sér innflytjendur sem ódýrt vinnuafl og í mörgum tilfellum farið þannig með þetta blessaða fólk að það er til háborinnar skammar og ætti að meðhöndlast sem sakamál. Þarna vildi ég sjá Samfylkinguna og Vinstri græna koma sterkari inn, ekki stendur á því á tyllidögum að þeir þykist bera hag launafólks fyrir brjósti. En þar sem Framsókn og Sjálfstæðisflokkur eru bara eignarhaldsfélög auðmanna á Íslandi á ekki að koma á óvart að þau gleypi við ódýru vinnuafli. En með þessu háttalagi á eftir að draga niður öll laun í landinu. Þeir sem finnst þetta ekki snerta sig núna eiga eftir að átta sig á því að það kemur líka að þeim, en þá verður það orðið of seint. Atvinnurekendur verða aðspurðir alveg heilagir í framan og segjast borga öllum útlendingum samkvæmt taxta, en sleppa því að segja að þar er um að ræða lámarkstaxta og enginn Íslendingur fæst í vinnu fyrir þau laun. Það þarf að setja hörð viðurlög við því ef einhver er á lægri launum bara af því að hann er útlendingur. Ef það tekst trúi ég að straumur fólks hingað í atvinnuleit verði ekki meiri en við ráðum við. Alla vega minnkar þrýstingur frá atvinnurekendum. Sumir þeirra sem hafa verið að flytja inn vinnuafl hafa sleppt því að upplýsa fólkið um sjúkratryggingar og þaðan af síður séð sóma sinn í að tryggja það. Ef fólkið síðan lendir í slysi eða heilsan brestur lendir kostnaðurinn á íslenskum skattgreiðendum. En sem betur fer eru margir atvinnurekendur til sóma og með alla hluti í lagi.

Þá sem koma hingað og hyggjast setjast að þarf að upplýsa um hvernig íslenskt þjóðfélag virkar og hver réttindi þeirra og skyldur eru ef þeir ætla að búa hér. Það þarf að benda fólki á að hér er trúfrelsi. En við erum kristið samfélag og ríkir um það þokkaleg sátt, bæði hjá okkur sem erum trúleysingjar og þeim sem hafa aðra trú en kristna. Að hjá okkur sé það viðurkennd aðferð, að þegar þú vilt fá fólk til að skipta um skoðun er beitt fortölum, en ekki ofbeldi, eða yfirgangi. Það þarf að benda á að minnsta að kosti í orði ríkir hér algert jafnrétti milli kynja, stétta, litarhátta og trúarhópa. Íslendingar eru húmoristar og telja sér leyfilegt að gera grín að flestu. En hafa ber í huga að bera skal virðingu fyrir skoðunum annarra.

Við eigum að taka vel á móti þeim sem hingað vilja koma og hjálpa þeim að aðlagast íslensku samfélagi. En við verðum líka að sætta okkur við að þeir hafa aðra menningu sem mun lita okkar. En við höfum sem betur fer verið að taka breytingum frá því að hingað flykktust ofbeldismenn frá Noregi fyrir um ellefuhundruð árum.

Höfundur er rafvélavirki.